2 gianod sa sapa patay

CEBU, Philippines - Patay ang inahan ug anak human sila nangalumos dihang buot unta nilang luwason ang ilang kabanay nga lalaki nga naanod sa miawas nga sapa nga ilang gitabokan kagahapon sa buntag sa barangay San Isidro, lungsod sa Tabogon.

Ang mga nangamatay mao si Concina Monares Espinosa, 78, ug anak niining si Norma Espinos Frias, 53, parehong taga sitio Lib-og, barangay Salag sa nahisgutang lungsod.

Samtang ang ilang umagad nga naluwas kinsa nagbakasyon diha sa maong dapit mao si Dexter Oltiano, taga dakbayan sa Lapu-Lapu.

Si Senior Inspector Alexander Angcao, hepe sa Tabogon Police Station sa pakighinabi niini sa Banat News kagahapon nagkanayon nakit-an nila ang patay’ng lawas ni Concina usa ug tunga ka kilometro gikan sa ilang gianuran alas-10 pasado sa buntag.

Ang anak niining si Norma diha na makuha sa dagat sa barangay Camobo-an sunod nga barangay sa San Isidro nga dunay gilay-ong tulo ka kilometro gikan sa sapa diin sila maanod alas 2 kapin sa hapon kagahapon.

Si Oltiano ang nakagunit dayon og kawayan hinungdan nga naluwas ug nakapauli kini ngadto sa balay sa iyang ugangan.

Matud ni Angcao   nakadungog sila og mga estorya kabahin sa maong insidente hinungdan nga ilahang gisusi ang lugar nga nahitaboan ug human makompirma ang report mipahigayon dayon sila og search and retrieval operation.

Sa wala pa mahitabo ang insidente ang tulo gikan sa ilang balay nagsakay og motorsiklo paingon ngadto sa lungsod aron si Concina kinsa usa ka senior citizen mokuha unta sa iyang Christmas gift.

Si Oltiano maoy nagmaneho sa motorsiklo nga ilang gisakyan ug dihang naabot sila sa sapa si Concina ug Norma gipakanaog ni Oltiano tungod kay kusog ang bul-og sa tubig tungod sa pagsige og uwan.

Dihang nagpaingon nang motabok ngadto sa sapa si Oltiano dunay punoan saging nga naali sa agianan diin maglisod og agi ang motorsiklo hangtud nga kini natumba ug gianod uban sa motorsiklo.

Swerteng nakagunit kini og kahoy dayon ngadto sa kawayan hinungdan nga nakasaka siya paingon ngadto sa daplin sa sapa.

Apan sa iyang paglingi ang iyang ugangan ug bayaw wala na diha sa ilang nahimutangan. Matud ni Angcao nga posibleng ang duha misuway og luwas ni Oltiano apan nangaanod na hinuon kini.

Si Angcao midugang nga ang motorsiklo ni Oltiano maoy una nilang na-retrieve gikan sa sapa ug si Oltiano diha na kini nila makit-i sa pantalan sa Camobo-an tungod kay mitabok kini dihang gihaw-as ang patay’ng lawas ni Norma.(/EIM)(BANAT NEWS)