Mama nga nagkugos sa anak napunggit

CEBU, Philippines - Patay ang usa ka ginang kinsa nagkugos pa sa usa ka tuig niyang anak nga babaye dihang silang duha nadasmagan sa sakyanan nga gimaneho og langyaw nga mi-hit and run kanila diha sa sitio Kadre sa barangay Poblacion lungsod sa Medillen niadtong Domingo atol sa adlaw sa Pasko sa alas 5:40 sa hapon.

Ang patay nang nadangat sa tambalanan mao si Cherry Noynay, nagpuyo sa barangay Daanlungsod sa Medillen samtang ang nakadasmag kaniya mao ang Kia Sorento nga sakyanan nga gipanag-iya ug giingong gimaneho ni Richard Horton, 65, nga usa ka British national nga naminyo og Filipina nga anaa usab manimuyo sa maong lugar.

Matud ni PO2 Roland Ruben sa Medillen Police Station dihang nahinabi sa Banat News subay sa imbestigasyon ang biktima naglakaw daplin sa karsada sa tuong bahin paingon sa norte nga nagkugos sa iyang usa pa ka tuig nga anak nga babaye. Ang langyaw gikatahong paingon usab sa susamang direksyon gikan sa Poblacion paingon sa barangay Daanlungsod apan pag-abot sa maong lugar nadasmagan sa suspek ang biktima ug imbes nga mohunong aron tabangan ang duha mipasirit hinuon kini pahilayo ang maong langyaw.

Ang mga tawo nga diha sa lugar mao nay mitabang paghatud kanila sa Verallo District Hospital sa Bogo City ug tungod kay kritikal ang kahimtang gibalhin dayun kini sa Vicente Sotto Memorial Medical Center apan gideklarar nga dead on arrival. Hinuon sa nahipos nga inpormasyon sa kapulisan naluwas ang batang babaye niini nga gikugos nga nalabay usab atol sa hitabu.

Matud ni Ruben nasuta sa ilang imbestigasyon nga ang langyaw maoy responsable hinungdan nga ilaha kining giadto sa iyang gipuy-an ug giimbitar apan kusganon kining mihimakak nga nakadasmag siya og tawo. (BANATNEWS)