Empleyado sa nasunog nga dept. store patabangan

CEBU, Philippines - Gimandoan ni Mayor Michael Rama ang Manpower Development and Placement (DMDP) nga gipangulohan ni Fidel Magno nga mohimo og inventory sa mga empleyado sa nasunog nga Gaisano South Capital.

Nagkanayon si Rama nga tagaan sa siyudad og temporaryong programa ang mga empleyado sa nahisgutang tindahan busa gipatun-an na niya kung unsa nga mga programa ang mohaom niini.

Nasayran nga moabot ngadto sa 1,800 ka mga tawo ang nagtrabaho sa maong department store ug ang 1,000 niini mga empleyado mismo sa Gaisano South Capital, samtang ang 800 mga empleyado sa mga tenants sa nahisgutang tindahan.

Kini naglangkob na sa office personnel, sales boy ug sales lady, security guards, utility workers ug uban pa.

Nakig-estorya na si Rama ngadto sa Department of Trade and Industry (DTI) ug Department of Labor and Employment (DOLE) aron maabagan sa ilang programa ang apektadong mga empleyado.

Samtang misugyot usab si Rama ngadto sa mga kadagkoan sa Gaisano Capital nga ang ubang empleyado i-absorb sa uban nilang branches.

Nasayran nga moabot ngadto sa 17 ka branches nationwide ang Gaisano Capital ug dunay ubang branches niini nahimutang ra mismo sulod sa Sugbo sama diha sa Lapulapu, Carcar, Tabunok ug uban pa.

Dili usab mohatag og komento ang mayor kalabot sa report nga gibabagan ang mga bombero nga makasulod dihang nagsugod pa ang sunog nga maoy nakaingon sa pagkaugdaw niini.

Matud pa sa mayor nga iya na nga gitugyan sa mga bombero ang pagsuta sa rason niini basta ang importante nga wala’y nangaangol.

Ipasusi na usab ni Rama sa Office of the Building Official ang maong nasunog nga establisamento uban usab pagtambayayong sa mga contractor sa maong building aron makadesisyon kung unsay buhaton sa building.

Pipila sa mga pasiunang findings sa grupo mao ang pag-demolis nalang sa mga gabok nga bahin sa maong building.

Hangtud ning pagsulat sa balita wala pay gihatag nga danyos ug resulta sa imbestigasyon ang Bureau of Fire Protection sa siyudad. (BANATNEWS)