'Killer' sa maestro napatay

CEBU, Philippines - Napusilan patay sa mga polis ang suspek sa pagpamusil sa usa ka maestro sa barangay Binlod lungsod sa Argao niadtong miaging tuig human ang suspek gikatahong misukol ug nakigpinusilay sa mga polis nga buot untang modakop kaniya diha sa barangay Candingan lungsod sa Aloguinsan niadtong Sabado sa alas 2:15 sa hapon bisperas sa Pasko.

Ang suspek mao si Jiffy Caban, lumad nga molupyo sa maong lugar ug dunay alias warrant sa kasong murder nga pirmado ni Argao RTC Judge branch 26 Judge Maximo Perez.

Ang kaso may labot kini sa pagpusil patay sa magtutudlo sa lungsod sa Argao nga 52-anyos nga si Romeo Aquire Duran, residente sa barangay Binlod sa maong lungsod kinsa naigo sa walang aping ug namatay dihang gipusil niadtong Pebrero 2010.

Si PO2 Rodrigo Teo, imbestigador sa Argao Police Station dihang nahinabi sa Banat News mibutyag nga si Caban maoy usa sa duha ka suspek sa pagpatay kang Duran.

Samtang si PO2 Walter Dealagdon sa Aloguinsan Police Station dihang nahinabi sa Banat News mibutyag nga nakadawat sila og impormasyon kabahin sa presensya sa suspek sa maong lugar. Apan dihang ilang giadto aron unta i-serve ang warrant of arrest niini nakabantay ang suspek ug giunhan sa pagpusil gamit ang iyang . 357 nga armas ang mga polis.

Gumikan niini napugos ang mga polis pagbawos pagpusil ug naigo kini sa paa ug lawas ug dihang gihatud sa Carcar City District Hospital namatay kini samtang gitabang.

Ang kapulisan padayon pang nangita sa duha ka kauban sa suspek diin ang usa naila sa pangalang Arnel. (EIM)  (BANATNEWS)