29 ka kawani sa Capitol gi-promote

CEBU, Philippines - Puno sa kamaya ug kalipay ang gibati karon sa 29 ka mga kawani sa lalawigan sa Sugbo ubos sa Provincial Engineering Office ug sa Provincial General Services Office human sila hatagi og promosyon human pirmahe ni Governor Gwen Garcia ang ilang tagsa-tagsa ka mga appointment and promotion papers.

Unang nanumpa sa atubangan sa gobernador sa paghupot sa posisyon mao si Engr. Eulogio Pelayre kinsa pormal na nga gitudlo sa gobernador isip assistant provincial engineer ug officer-in charge sa Provincial Engineering Office.

Nanumpa usab si Engr. Paulino Entera isip division chief sa Real Estate Administration sa lalawigan.

Matud pa ni Noli Vincent Valencia, Head Personnel Division sa Human Resource Management Office nga ang maong promotion gibasi sa ilang tagsa-tagsa ka mga achievement sa ilang serbisyo ilabi na niadtong nagserbisyo na sa kapin 10 ka tuig sa pangalagad sa kagamhanan sa lalawigan.

Atol sa pagpanumpa sa nahisgotang mga kawani gihagit usab sila sa gobernador nga nunot ning ilang promotion dugangan unta nila ang ilang paningkamot, kadasig ug dedikasyon sa pangalagad sa katawhang Sugboanon.   - (BANAT NEWS)