Dugang serbisyo para sa Cagayan giumol

CEBU, Philippines -    Ang siyudad sa Sugbo moumol na usab og dugang pang programa sa padayon nga pag-alagad niini sa mga biktima sa bagyong Sendong.

Nagkanayon si Mayor Michael Rama nga nahibalik na dinhi sa siyudad ang unang team sa dakbayan nga mialagad didto sa Cagayan De Oro ug Iligan sa miaging mga adlaw.

Samtang ang executive director sa Cebu City Disaster Risk Reduction and Management Council (CCDRDMC) nga si Alvin Santillan mibutyag sa kamalampuson sa gihimo nilang relief operation didto sa nahisgutang mga dapit.

Nagplano ang iyang grupo nga magpatapok og nagkadaiyang ahensiya sa gobiyerno alang sa mga evacuation center nga mao ang dali nga kapadulngan sa mga tawo isip “action center”.

“Nindot kaayo ang maong plano, ug pananglitan sa usa ka area, adunay mga tent nga i-provide alang sa Department of Health, DWSD ug uban pa”, sumala ni Santillan.

Dugang pa niya nga dili pa lapad ang disaster group didto sa Cagayan busa kinahanglan nila nga makigdugtong sa nasudnong mga ahensya sa gobiyerno.

Andam hinuon si Santillan nga mohimo og mga lecture alang sa disaster group sa mga local government unit sa Cagayan de Oro City ug Iligan. Gipahibalo usab niya nga laing hut-ong na usab   ang molarga paingon ngadto sa Cagayan de Oro sa sunod semana diin usa na niini mao si Kapitan Dave Tumulak sa Basak Pardo.

Kahinumdoman nga wala madayon ang pagpadala sa “mobile morgue” sa maong dapit apan si Santillan nagdala og laing kahimanan aron usab magsilbing sentro nga kabutangan sa mga patay’ng lawas nga mailhan dayon sa ilang mga kabanay.  - (BANAT NEWS)