BPSO nanakmit og video karera machines

CEBU, Philippines - Tulo ka mga video karera machines ang gisakmit sa Barangay Peacekeeping and Safety Office o BPSO sa barangay Punta Engaño sa dakbayan sa Lapulapu sa milabay’ng adlaw diha sa sitio Kulo, Lupa ug Malingin sa maong barangay apan walay polis nga gipakuyog sa operasyon.

Matud pa ni Punta Engano barangay kapitan Lourdes Ibag gituyo nila nga wala na sila mangayo og abag sa kapolisan gumikan sa pagpaniguro nila nga makuha ang maong mga video karera.

Giklaro hinuon niyang wala kini magpasabot nga wala silay salig sa mga polis apan base sa ilang kasinatian giingong hasolan sila sa mga polis sanglit pangitaan pa sila niini og search warrant kung duna silay buot nga iparonda.

Kini maoy hinungdan nga sagad sa ilang sakmitonon nakaeskapo.

Atol sa maong pagpangronda walay nasikop nga tag-iya sa maong mga video karera nga gibutang kilid sa mga panimalay sa mga gidudahang caretakers niini.

Ang nasakmit nga makina ihatud unya nila sa kapolisan human unya sa ilang himuong imbentaryo. (BANATNEWS)