CEBU, Philippines - Nahanaw ang P274,000 nga salapi sa usa ka shipping company sa dakbayan sa Danao dihang usa ka kawani nga paingon unta sa pagdeposito sa ilang kwarta ang gitulis diha sa dalan F. Ralota sa barangay Poblacion, dakbayan sa Danao ala-1 pasado ang takna sa hapon niadtong miaging adlaw.
Si SPO3 Ildefonso Prosia sa Danao Police Station miingon nga nagsakay og traysikad ang kawani sa Jumalia Shipping Lines nga si Jenny Cole, paingon sa Land Bank of the Philippines sa barangay Poblacion sa maong dakbayan aron unta ideposito ang maong salapi.
Apan pag-abot sa maong lugar kalit kining gibabagan og blue nga motorsiklo nga giluwanan sa duha ka wala hiilhing armadong lalaki nga nag-bonnet dayong tion kang Cole ug mideklarar og tulis.
Matud pa ni Prosia nga nagdumili unta ang biktima sa paghatag sa bag apan nasuko ang tulisan ug gihapak ang ulo niini sa puloan sa armas dayon gikuha ang bag.
Human niini daling misakay sa motorsiklo ang tulisan ug mipabulhot paingon sa direksyon sa habagatang Sugbo. (BANATNEWS)