CEBU, Philippines - Moabot sa 72 ka mga tiguwang nga masakiton sulod sa usa ka charity institution ang nakadawat og pinaskuhan gikan sa buhatan sa Criminal Investigation and Detection Group (CIDG-7).
Kasagaran kanila dunay mga nagkalain-laing mga gihambing sakit ug naglingkod nalang sa wheel chair dihang gipanghatagan og pinaskuhan sa CIDG-7 pinangulohan ni CIDG-7 Senior Supt. Jose Pante.
Ang mga sakop ni Pante maoy nag-distribute sa mga dagkong putos nga dunay sulod nga adult diapers, toiletries, ug uban pang mga gikinahanglan sa mga tigulang masakiton.
Ang 72 ka mga tigulang lalaki, wala nay nag-atimang mga anak o mga apo dinhi sa dakbayan.
Sila anaa sa sulod sa usa ka balay nga gitawag og “Gasa Sa Gugma” nga gidumala sa Missionaries of Charity nga gitukod kaniadto ni kanhi Archbishop Ricardo Cardinal Vidal niadtong tuig 1987.
Ang labing edaran nga naa sa maong dangpanan nagpangidaron og dul-an 100-anyos ug ang labing bata kapin 50-anyos
Usa ka Indian nga madre ug nagpailang si Sister Sheila nagkanayon nga nagsalig lang ang ilang institusyon sa mga donasyon alang sa inadlaw-adlaw nilang panginahanglan.
“Tanan gikan sa Ginoo,” matud pang Sister Sheila nga larino nang mosulti og pulong binisaya. Gidugang niya duna silay mga doktor nga mobisita ug mopahigayon sa check-up sa panglawas sa mga tigulang.
Sa interbyu, si Pante nagkanayon nga ilang gipili ang Gasa Sa Gugma charitable institution tungod kay ilang silang gikunsiderar nga ‘poorest among the poor.’
Matud ni Pante nga ang grasya nga ilang gihatag ngadto sa mga tigulang tipik ug kabahin ra kini sa grasya nga ila usab nga nadawat.(/EIM) (BANATNEWS)