Tips sa DOH karong Pasko

CEBU, Philippines - Sa pagsaulog sa Pasko ug Bag-ong Tuig ang Department of Health (DOH) miawhag sa publiko nga magmatngon sa mga pagkaon nga ilang giandam ug sa mga duwaan nga iregalo ngadto sa kabataan aron malikayan ang kahasol ug kadaot sa panglawas.

Base sa health advisory sa DOH kinahanglang limpyo ug tarungon og luto ang mga pagkaon aron malikayan ang food and water-borne diseases, samtang kinahanglang pilion og maayo ang palitong processed food. Ang mga sobrang pagkaon ibutang sa limpiyong sudlanan ug pwedeng ibutang sa freezer o refrigerator ug kung wala niini takloban kini og maayo ug tarongon sa pag-init kung kaonon pag-usab.

Gipasabot sa DOH nga ang water-borne diseases usa ka grupo sa sakit nga magdala og infection tungod sa kagaw, viruses ug parasites ug non-infectious agents nga gikan sa kemikal, mananap ug plant toxins. Makuha kini sa mga hugaw nga lugar, hugaw nga tubig, mga pagkaong ibaligya sa karsada, pagpataka og panikma, luwa ug uban pa.

Samtang gipahimangnoan sa DOH ang publiko nga dili magpatakag palit og duwaan ug pilion lang kadtong duwaan nga haom sa bata ug adunay leksyong makat-onan sa pagduwa niini ug labaw sa tanan kang luwas sa ilang panglawas.

Masiguro kini kung adunay klarong label ug supervisory label aron malikay sa disgrasya. (BANATNEWS)