Habalhabal limitahan

CEBU, Philippines - Aron malikayan ang aksidente sa pipila ka mga habal-habal ug sa pasahero ang kagamhanan sa probinsya sa Sugbo ug syudad sa Sugbo nagplanong i-regulate ang gidaghanon niini.

Atol sa panagtigom nila ni Gov. Gwendolyn Garcia, Mayor Michael Rama, Balamban Mayor Ace Binghay ug Lahug barangay kagawad Mary Ann Delos Santos ilang natuki ang risgo sa mga habal-habal drayber ug sa ilang mga pasahero diha sa main road.

Gihulagway ni Garcia nga usa ka risgo alang sa ubang mga sakyanan kun ugaling adunay habal-habal sa national road.

Sumala pa ni delos Santos ang mga habalhabal nga mag-terminal sa Lahug maabot sa paghatud sa ilang pasahero didto sa Balamban ug overloaded kini.

Ang usa ka motorsiklo aduna ray limit nga duha ka pasahero apan sa mga aresgadong drayber kargahan nila kini og tulo ngadto sa upat ka pasahero nga daw namunginging bunga sa mangga ang ilang motor.

Gawas sa tungason ug daghang bung-aw nga agian mas peligro pa gyud kini kung dautan ang panahon.

Tungod niini si Rama nakahuna-huna og pamaagi aron malikayan ang karisgo sa mga habal-habal drayber ug sa pasahero niini. Usa sa nahunahunaan ni Rama mao ang pagbutang og rota sa jeepney gikan sa main road samtang ang mga habalhabal limitahan ra sa mga sudlonong bahin sa bukirong barangay. (BANATNEWS)