Mipatay sa kapuyo hayan mabuhian

CEBU, Philippines - Hayan buhian ang lalaking gitumbok nga mitigbas-patay sa kapuyo niini niadtong Biyernes diha sa ilang balay sa barangay Ibo, dakbayan sa Lapulapu kun walay mopasaka kaniya og reklamo.

Matud ni Inspector Zenaido Pastorfide, ang hepe sa Homicide Section sa maong dakbayan nga nahinabi sa Banat News hangtud ning pagsulat sa balita wala pa makigkita kanila ang mga kabanay sa biktimang si Mishell Mangubat alang sa pagpasaka og reklamo batok kang Vicente Vasquez. 

Sumala pa ni Pastorfide kung dili nila mapasaka ang kaso karong adlawa hayan ilaha kining buhian karong hapon subay sa balaod. Apan kini mahimo gihapong pasakaan og kaso ‘at large.’

Si Pastorfide miingon nga nakadawat sila og pasiunang kasayuran gikan sa pag-umangkon sa biktima nga ang ilang apohan mipadayag nga dili sila interesadong mopasaka og kaso.

 Ang suspek nadakpan sa trabahoan niini sa dakbayan sa Sugbu una nang miangkong iyang gipatay ang biktima tungod sa pangabubho niining duna kini naabtang lalaki sulod sa ilang balay nga gipangangkon sa babaye nga paryente. (BANATNEWS)