P5.5M itabang sa Lapulapu sa Mindanao

CEBU, Philippines - Migahin og P5.5 milyones ang dakbayan sa Lapulapu aron itabang sa mga biktima sa bagyong Sendong didto sa Cagayan de Oro City ug Iligan City.

Matud pa ni Jonjie Gonzales ang media consultant sa dakbayan, si Lapulapu City Mayor Paz Radaza miduso kini og P5.5M nga gahin alang sa mga nabiktima sa Mindanao.

Atol sa regular session sa konseho sa dakbayan sa Lapulapu si Kon. Lei Dignos Vidal ang chairman sa Committee on Finance maoy mihatag og pagtagad niini ug dali kining giaprobahan sa mga sakop sa konseho.

Sa maong gahin P500 mil ipadala sa dakbayan sa Iligan ug ang P5 milyones ihatag ngadto sa Cagayan de Oro.

Subay niini mipadangat sa ilang pahasubo ang mga sakop sa konseho sa mga biktima.

Ang maong mga dakbayan maoy nagrabehan sa flashflood dihang miigo ang bagyong Sendong niadtong Biyernes sa gabii ug mikalas na og kapin sa 1,000 ka tawo, gatosan ang missing, liboan usab ang nawad-an og panimalay.

Una nang mipadayag nga mopadala og hinabang ang Cebu City, Kapitolyo ug Mandaue samtang nagpadayon usab ang fund raising ug relief collections sa nagkadaiyang sektor dinhi sa Sugbu aron itabang didto sa Mindanao. (BANATNEWS)