CEBU, Philippines - Mga nanggawas nga taho kalabot sa nahimong mirakulo ni Blessed Pedro Calungsod walay bisan usa nga tinuod sumala pa sa Postulator of the Canonization of Pedro Calungsod, Msgr. Ildebrando Leyson.
“Walay bisan usa sa reports ang tinuod,” pagklaro pa niini nga ang nanggawas nga balitang nagmilagro si Blessed Calungsod dili mao apan tinud-anay nga aduna gyud kini nahimong milagro nga wala usab ibutyag ni Leyson.
Matud pa niya anha lang niya kini ibutyag kung aduna nay opisyal nga pahibalo nga ipagawas ang Vatican kalabot niini. Sa mga nanggawas nga balita, giisip nga milagro ang kalit nga pagkaayo sa usa ka ginang nga adunay grabeng balatian nga wala na motumar og tambal ug nagpaabot nalang og milagro gikan ni Calungsod.
Mipasabot si Leyson nga sa dili pa pagabuhaton ang paggawas sa Decree of Miracle kasagarang mahitabo aduna pay panagtigum sa tanang Cardinal lukop kalibotan aron hisgutan kun si kinsa ang mga mamahimong Santos.
Human niini, ang Santo Papa na usab ang modesider kun kanus-a ang tukmang oras nga iyang ideklarar nga Santos na gyud si Pedro Calungsod.
Sa laing bahin, wala pay plano ang simbahan alang sa selebrasyon sa pagka-Santos unya ni Blessed Pedro Calungsod. Apan gihulagway ni Leyson nga posibling una unya nga pagabuhaton sa simbahan mao ang pag-andam sa katawhan spiritually, gawas niini, hatagan usab og ensaktong impormasyon ang katawhan kalabot ni Blessed Pedro Calungsod.
Samtang gihulagway usab ni Leyson nga hilabihan ang kalipay ni Archbishop Jose Palma sa balita kalabot ni Blessed Pedro Calungsod.
Sa report sa TV Patrol Central Visayas, hilabihan usab nga kalipay ang gibati ni Cardinal Vidal human sa 25 ka tuig niya nga paghikay aron mamahimong santos si Blessed Pedro Calungsod milampos kini. (Lesley Caminade-Vestil/EIM) (BANAT)