Maestro napatay sa manok

CEBU, Philippines - Namatay ang usa ka maestro human kini maoy kini atol sa kapistahan sa sitio San Isidro barangay Perrelos siyudad sa Carcar niadtong Martes sa alas 3:45 sa hapon.

Ang biktima mao si Pabiano Alesna Macasero, 53, nagpuyo sa Villa Anonang barangay Liboron ug maestro sa Liboron Elementary School.

Matud ni PO3 Vicente Garces sa Carcar City Police Station dihang nahinabi sa Banat News ang maong maestro gikatahong nanari sa gipahigayung tigbakay sa maong lugar.

Matud pa ni Garces nangunay ang maestro og buhi sa manok niini sulod sa ruwedahan apan sa dayon na niyang pagbuhi sa manok siya maoy giatake sa manok sa iyang kaatbang.

Sumala pa nga kalit nga mi-cutting padulong kaniya ang manok ug siya maoy gidabodabohan og labok.

Sumala pa sa ilang nakuhang impormasyon tulo ka higayun nga gisyapolan si Macasero diha sa iyang tuong tiil nga maayong pagkaigo sa hait nga buwang ug nag-awas-awas ang dugo.

Wala dayon makatabang ang mga tawo diha sulod sa rwedahan kay nangahadlok ug nag-iyahay og panagan ug ang uban mikatkat aron makalikay sa duha ka armadong manok.

Tungod sa pagsige og syapol sa manok kang Macasero nahagit usab ang manok sa biktima nga iyaha nang nabuhian ug daw agi og panimalos gikusokuso niini ang maong manok nga miatake sa iyang agalon.

Sumala pang Garces bisan nagkaguliyang na ang mga tawo aron kuhaon ug mapagawas si Macasero sa ruwedahan gipunayan usab og syapol sa manok sa biktima ang kontra hangtud nga iya kining napatay.

Si Macasero gihatud dayun sa tagdumala sa maong ruwedahan sa Carcar City District Hospital apan dangtan og pipila ka gutlo namatay kini samtang gitabang sa mga doktor.

Midaog man tuod ang manok ni Macasero apan napildi gihapon ang kinabuhi niini. Gidudahan nga nahutdan sa dugo si Macasero nga maoy nakaingon sa iyang kamatayon.(/EIM) (BANAT)