Opisyal sa mga trike drivers gipatay

CEBU, Philippines - Gipusil patay sa lalaking nagmotor ang presidente sa kahugpungan sa mga traysikol samtang nagpakanaug kini og pasahero diha sa highway sa barangay Dawis Norte sa lungsod sa Carmen niadtong Martes sa alas 7:25 sa gabii.

Ang biktima nga nalungag ang ulo sa mga samad pinusilan mao si Edmar Doble, 43, nagpuyo sa maong lugar ug maoy presidente sa kahugpungan sa mga traysikol drayber sa siyudad sa Danao.

Duha ka lalaking sakay og motorsiklo nga nag-angkasay ang gitumbok nga responsable sa kremin.

Matud ni PO2 Jezrhel Into sa Carmen Police Station dihang nahinabi sa Banat News nagdiskarga sa iyang pasahero ang biktima dihang kalit gihunongan sa mga gikatahapan ug ang angkas niini mipusil sa biktima makadaghang higayun.

Nakaangkon og duha ka lapos nga samad pinusilan sa ulo ang biktima kinsa nahagba tungod sa iyang traysikol ug nga gibiyaan sa mga gikatahapan.

Ang kapulisan naka-recover og usa ka deformed slug gikan sa wala pa matinong kalibre sa armas.

Matud ni Into daghang anggulo ang ilang gikonsiderar sa ilang imbestigasyon aron matumbok ang suspek ug motibo sa kremin.

Kini naglakip na sa iyang pagka presidente sa kahugpungan sa mga traysikol drayber ingon man ang gamay’ng negosyo niini nga isdaan diha sa merkado publiko sa lungsod sa Carmen ug uban pa. (/EIM) (BANAT)