DepED ug Fres-C nagtambayayong vs malnutrisyon

CEBU, Philippines - Nunot sa nagkagrabeng sitwasyon karon sa malnutrisyon ilabi na sa kabatataan sa mga tunghaan ang Department of Education ug Fres-C nga usa ka powdered-juice brand sa Ajinomoto Philippines Corporation (APC), nagtambayayong pinaagi sa Batang Fres-C Hataw Campaign.

Kining maong kampanya nagtinguha sa pagpakatap sa saktong pagkaon ug ehersisyo sa mga kabatan-onan ug kini naglambigit sa 58,000 ka estudyante sa 36 ka pilot schools tibuok nasud.

Ang mga datos gikan sa DepEd Health and Nutrition mipakita nga samtang daghang kabatan-onan ang undernourished, daghan usab ang nagsugod og pagka-overnourished o kadtong naghinobra katambok.

Gikan sa 12.9 milyones nga estudyante sa elementarya nga gitimbang sa tuig 2010-2011, milabaw sa 2 milyones o 16% ang gitawag og undernourished samtang labaw sa 356,000 kanila o duol sa 3% ang gitawag nga overnourished.

Ubos niining mga pamahayag, ang DepEd Health and Nutrition section mirekomenda sa mga bata nga magbaton og pagkaon nga puno sa sustansya ug ehersisyo sa lawas aron makab-ot ang himsog nga panglawas.

Sa pagpahigayon sa Batang Fres-C, gitudloan sila sa mga saktong pamaagi sa pagpuyo diha sa kahimsog pinaagi sa lecture ug mga duwa. Ang sentro sa maong programa mao ang ilang pagbuhat sa “Hataw Exercise,” usa ka kombinasyon sa cardiovascular exercise ug calisthenics nga gihimo sa grupo ni Professor Hercules Callanta sa UP College of Human Kinetics.

Labi pa niini, usa ka video sa maong Hataw Exercise ang gibilin sa matag tunghaan aron magpadayon ang ilang pagbuhat sa maong ehersisyo.

Sa pagseguro nga adunay saktong pagkaon ang mga bata, diha sa ilang panimalay ug sa tunghaan, ang Batang Fres-C Campaign mipahigayon usab og usa ka Nutrition 101 seminar diin ang mga representante sa DepEd Health and Nutrition Section nagtudlo og saktong nutrition alang sa mga bata, base sa Nutritional Guidelines for Filipinos, sa mga ginikanan, sa mga magtutudlo, apil na ang mga nagdala sa school canteen.

Matud pa ni Beverly Po, Category Manager for Sweeteners sa APC usa sa nakita nilang makatabang sa pagsulbad sa problema mao ang paghimo sa Fres-C nga puno sa sustansya ug adunay natural fruit juice nga mohatag sa lawas sa gikinahanglang Vitamin C nga makapalig-on sa immune system sa baratong presyo. (BANAT NEWS)