Usa sa 10 most wanted nadakpan

ORMOC CITY, Philippines – Human sa tulo ka tuig nga pagtagotago tungod sa kasong frustrated murder nadakpan ra gyud sa kapolisan ang 52-anyos nga suspek diha sa bukirong barangay sa Ormoc.

Giila ang nadakpan mao si Romeo Ollave, residente kaniadto sa barangay Magaswe apan temporaryo nang nagpuyo karon sa bukirong barangay sa Cabingtan.

Si Sr. Insp. Shevert Alvin Machete, ang hepe sa police station 1 sa maong dakbayan mibutyag sa Banat News nga si Ollave mitago human kini mapasakai og kaso kalabot sa pagpanigbas niini sa usa ka Elizer Lamoste niadtong 2008.

Si Lamoste nakaangkon og samad tinigbasan sa mata. Migawas ang warrant of arrest batok sa suspek niadtong Enero 2010 nga giisyu ni Judge Apolinario Buaya sa RTC Branch 35 sa Ormoc City.

Adunay piyansang P200 mil nga gipangayo ang korte alang sa temporaryo niining kagawasan. (BANAT NEWS)