32-anyos sikop sa buybust

CEBU, Philippines - Nasikop sa usa ka buy bust operation sa kapulisan ang gitumbok nga notadong tigpayuhot og ginadiling drugas nga giingong nagbalikbalik na sulod ug gawas sa bilanggoan sa barangay Mantalongon sa lungsod sa Dalaguete niadtong Lunes sa alas 10:15 sa gabii.

Ang nasikop mao si Fredirick Estremos Mabuting alyas Fredie, 32, nagpuyo sa maong lugar.

Matud ni PO3 Christopher Requina sa Dalaguete Police Station dihang nahinabi sa Banat News nakadawat sila og impormasyon nga namaligya og ilegal nga drugas ang suspek.

Ang hepe sa kapolisan sa maong lungsod nga si Insp. Dexter Basiergo milusad dayon og operasyon batok sa suspek ug gamit ang P300 nga buy bust money sa poseur buyer gisikop kini human motunol og usa ka paketeng shabu.

Atol sa pagrekisa nakuhaan kini og dugang usa ka paketeng shabu. Ang suspek nalakip kini sa watchlist sa mga drug pusher sa maong lugar. (BANAT NEWS)