Balay gilabay og Granada

CEBU, Philippines - Nagusbat ang atubangang bahin sa usa ka panimalay apan swerteng way tawong naigo xx dihang usa ka granada ang giingong gilabay sa nagmotorsiklong upat ka mga lalaki diha sa sitio Bonsay sa barangay Bolinawan siyudad sa Carcar kagahapon sa alas 12:00 sa tungang gabii.

Ang tag-iya sa maong panimalay mao si Mersiles Bargamento, molupyo sa maong lugar kansang pamilya nangatulog nianang mga orasa.

Matud ni SPO1 Norman Lapena sa Carcar City Police dihang nahinabi sa Banat News nangatulog ang pamilyang Bargamento niadtong tungura dihang kalit nihunong sa tungod sa ilang balay ang upat ka lalaking nag-angkasay sa motor ug milabay og granada sa balay.

Ang pamilyang Bargamento nahigmata nalang sa lanog nga buto sa granada ingon man ang mga silingan niini ug sa ilang pagsusi nangabuak na ang ilang bintana sa atubangang bahin ug nabuslot buslot ang bungbong apil na ang kisame sa atop sa atubangan.

Sa gihimong imbestigasyon nila ni SPO2 Jeorame Tanodtanod sa mga silingan ug sa pamilyang Bargamento giingong usa sa upat nga milabay sa granada nailhan nila nga ginganlan og ‘Ricky.’

Ang kapulisan nag-imbestigar na sa background sa pamilyang Bargamento kung aduna ba silay nakaaway sa nanglabay’ng mga adlaw. (BANAT NEWS)