Pagka-santos ni Blessed Calungsod gitugotan

CEBU, Philippines - Gipahibalo sa Vatican nga sugdan na ang canonization alang sa pagbayaw isip bag-ong santos ni Blessed Pedro Calungsod.

Migawas ang taho kagahapong adlawa gikan sa Vatican news site diin opisyal nga gi-aprobahan ni Pope Benedict XVI ang promulgation of decrees for canonization ni Calungsod ug laing unom ka mga kandidato pagka-Santos kinsa nakahimo og tagsa-tagsa nga milagro.

Wala pay eksaktong petsa alang sa canonization rites ni Calungsod, apan kun mahitabo na ang takna sa canonization sa bisayang si Calungsod, siya maoy mamahimong ikaduhang Filipino nga Santos sunod ni San Lorenzo Ruiz.

Labing lig-ong milagro nga gibuhat ni Calungsod nahitabo niadtong tuig 2003 sa usa ka tambalanan dinhi sa Sugbo diin usa ka babayeng gideklarar nga ‘clinically dead’ sulod sa duha ka oras tungod sa sakit sa kasing-kasing ang nabuhi human mag-ampo ang iyang mga tagtungod ngadto ni Calungsod. Ang 17-anyos nga katekista maisip nga usa ka martir human siya patya niadtong tuig 1672 atol sa usa ka missionary work didto sa Guam . Niadtong tuig 2000, gihimo siyang beato ni anhing Pope John Paul II.

Sa iyang bahin, si Archdiocese of Cebu Episcopal Vicar Msgr. Esteban Binghay nagkanayon nga dakong butang alang sa simbahan ang pagka-canonized ni Calungsod.

“Archbishop Palma (Jose) and Archbishop Cardinal Vidal (Ricardo), apil pud ko ug uban pang mga kaparian ang motambong sa canonization, siyempre dili lang kay Pinoy, Bisaya pa gyud si Calungsod,” matud pa ni Binghay.

Naglaom si Binghay nga mahimong inspirasyon si Calungsod sa mga batan-on. “Modelo gyud siya sa mga batan-on, bata pa siya pero iya nang gihalad iyang kinabuhi ngadto sa Ginoo,” pasabot pang Binghay.(/EIM)(BANAT NEWS)