100 lungon ihatag sa Cebu City

CEBU, Philippines - Mopadala og 100 ka mga lungon ang kagamhanan sa siyudad sa Sugbo ngadto sa mga naapektohan sa grabeng pagbaha sa Iligan ug Cagayan de Oro diin dul-an na sa usa ka libo ka mga tawo ang nakalas.

Nasayran nga pipila na ka mga local government unit ang nagtampo-tampo na og hinabang sa maong mga lugar nga giingong ang mga punenarya nahutdan na og stocks sa ilang lungon ug formalin. Si Assistant Treasurer Emma Villarete nagkanayon nga mohimo dayon og dinalian nga special session ang konseho aron mapadala dayon ang mga lungon kung diin nangita pa sila og bidder niini.

Si Bise Mayor Joy Augustus Young mipahibalo nga mohimo dayon sila og special session aron maaprobahan dayon ang maong request. Nasayran nga pipila sa mga nangamatay sa maong lugar ang giputos na lang og habol ug plastic gumikan kay nagkuwang ang lungon.

Una na nga gipadayag ni Mayor Michael Rama nga mohatag usab ug siyudad og P5 milyones ngadto sa Iligan ug Cagayan de Oro. Lakip na usab sa gahinan niini ang mga lugar sa pipila ka dapit sa Negros nga naapektohan sa Bagyong Sendong.

Ang Kapitolyo pinangulohan ni Gov. Gwendolyn Garcia mopadala na usab og 80,000 ka binotelyang tubig ug dugangan pa kini sa mosunod nga mga adlaw.

Samtang mipadala na usab og 400 ka mga lungon ang gobiyerno ngadto sa Mindanao tungod sa kakulang karon niini didto nunot sa pagsaka sa gidaghanon sa mga namatay ngadto na sa 957 dead ug 49 missing apan gikabalak-ang mosaka pa gyud sa umaabot nga mga adlaw.

Nagkaproblema karon ang mga punerarya didto kung unsay buhaton sa mga mahatud nga minatay gumikan sa kakulang na sa ilang formalin, lungon ug tubig

Ang mga aid workers miapelar sa publiko pagdonar og bottled water, habol, tents, sinina ug uban pa alang sa 45,000 nga nawad-an og mga balay ug kasamtangang nagpunsisok sa evacuation centers. Kagahapon ang Philippine Navy mikarga na og 437 ka mga puting lungon ug liboang mga binotelyang tubig.

Si Presidente Benigno Aquino III mideklarar na og state of calamity sa tibuok nasud ug mibisita sa Cagayan de Oro kagahapon aron mas mapadali ang proseso sa pagpagawas sa mga pundo alang sa kalamidad ug mapabiling patas ang presyo sa mga palaliton.

"Our national government will do its best to prevent a repeat of this tragedy," matud pa ni Aquino sa mga residenteng misugat kaniya.

"I do not accept that everything had been done. I know that we can do more. We must determine what really happened.Must this end in tragedy? We knew that (storm) was coming. There should have been efforts to avoid the destruction," pasabot pa ni Aquino.

Ang U.N. food agency mipadala na og tulo ka toneladang high-protein biscuits, mga tangke sa tubig, habol, tarpaulins ug tents nga paigo sa 75,000 ka tawo.

Samtang si U.N. Secretary-General Ban Ki-moon mipadayag sa kabalaka sa maong baha matud pa ni U.N. deputy spokesman Farhan Haq.

"The United Nations and its partners stand ready to support the government in responding to this disaster," dugang pa niini. (BANAT NEWS)