Nagselos gipatay sa kapuyo

CEBU, Philippines - Nagtaroy pa sa patay’ng lawas sa usa ka babaye ang kutsilyo nga gidunggab kaniya sa iyang selosong kapuyo sulod sa ilang lawak sa ilang gipuy-an sa sitio Commonwealth sa barangay Ibo, dakbayan sa Lapulapu alas-5 kagahapon sa buntag.

Ang biktima mao si Mishell Mangubat, lumad nga taga Negros Oriental ug ang suspetsado mao si Vicente Vasquez, 37, lumad nga taga Leyte kinsa nadakpan dayon.

Si Chief Inspector Conrado Manatad, hepe sa kapolisan sa Presinto 5 sa Lapulapu City Police Office (LLCPO) nga nahinabi sa Banat News miingon nga naghinobrang pangabubho maoy hinungdan sa pagpatay sa maong suspetsado sa biktima.

Dugang pa niya nga dugay nang nagtipon ang duha kinsa giingong pulos na kanhi adunay mga pamilya hangtod nga nakabaton sila og duha ka mga anak. 

Matud pa ni Manatad nga una nilang nadawat ang pahibalo sa mga barangay tanod sa Ibo human mosumbong ang 10-anyos nga anak babaye sa maong managkapuyo.

Si Manatad miingon nga ang bata mibutyag kanilang nakita niini ang usa ka tawo nga migawas nga maoy midunggab sa iyang inahan bisan ngitngit. Mibutyag usab ang bata nga nagtuo siyang sayong nakalakaw ang iyang papa sa trabahoan.

Dihang gisubay sa mga polis sa construction site diha sa Guadalupe ang bana sa biktima ug gipahibalo sa gidangatan sa naulahi nakabantay silang uga kaayo ang reaksyon niini sa balita.

Sa ilang pagsukitsukit nangangkon kining mitambong pa kini og Misa de Gallo sa simbahan sa Cebu Metropolitan Cathedral sa dakbayan sa Sugbo sa wala pa motrabaho.

Hinuon dihang direkta nila kining gipangutana kun may kalambigitan ba kini sa kamatayon sa kapuyo hugtanon kining mihimakak apan sa kadugayan giingong miangkon kini sa krimen.

Matud pa nga nagsugod ang kapungot sa suspek ngadto sa kapuyo sa miagi pang gabii dihang sa iyang pag-uli naabtan niyang adunay lalaki sa ilang balay nga giingong nangangkong paryente sa biktima.

Gani ilaha pa kining gipasalo sa ilang panihapon apan dihang milakaw na kini iyang gisukitsukit ang biktima apan misangpot kini sa ilang init nga panaglalis ug nahitabo ang maong krimen. (BANAT NEWS)