Wala makadug-ab namatay

CEBU, Philippines - Wala ‘gibalbal’ sa ungo nga maoy gidudahan sa mga tawo nga namatyan sa napulo pa ka adlaw nga bata diha sa barangay Tangke sa dakbayan sa Talisay sa miaging adlaw tungod kay nalumos sa gatas ang baga niini kay wala makadug-ab maoy hinungdan sa kamatayon niini sumala pa sa medico legal findings.

Base sa resulta sa awtopsiya sa PNP Crime Laboratory nasuta nga ang namatyan sa bata mao ang aspiration pneumonia butyag pa ni Dr. Joe Martin Fuentes.

Si Fuentes, medico-legal officer sa Philippine National Police Crime Laboratory miingon nga ang tuong baga sa bata dunay fluids nga gituohang gatas nga gipainom niini sa wala pa matulog ang bata niadtong Domingo sa gabii.

“Binuksan natin ‘yung body at nakita nga natin na may aspiration pneumonia ‘yung bata at affected ang lung niya,” asoy pang Fuentes.

Gidugang niya nga ang aspiration pneumonia mahitabo sa bata kun kini pakatulgon dayon human nga nakatutoy. Sumala pa niya nga ang gatas sa tiyan sa bata nga nainom kung dili makadug-ab mosaka pagbalik ug adto masulod sa baga, dunay higayon nga magsuka-suka ang bata.

“Baka pagkatapos niyang uminom ng gatas hindi muna nag-burp(dug-ab) at pinatulog kaagad kaya ‘yung fluid bumalik o nag-back flow,” pasabot pa niya.

Giklaro usab ni Fuentes ang dugo nga nakita sa bata dili kini tinuod nga dugo apan usa ka fluids gikan sa lawas sa bata human naputol ang umbilical cord (pusod) niini.

Sa pasiunang imbestigasyon nila ni SPO4 Daniel Tarucan, PO3 Ferdinand Pablo ug PO3 Benedicto Lasque sa Talisay niadtong milabay’ng Lunes ang ginikanan sa bata ug ang maguwang niini diha matulog sa sala sa ilang balay.

Niadtong Lunes sa kaadlawon nakamata ang inahan sa puya ug nabantayan niini nga dunay dugo nga nag-agas gikan sa ilong, baba ug pusod sa iyang anak nga masuso.

Ang magtiayon daling nangayo og tabang sa ilang iyaan nga diha magpuyo sa duol aron madala ang bata sa Talisay City District Hospital apan patay na kini pag-abot didto.

Tungod kay wala may klarong nakaesplikar dayon kabahin sa nahitabo migawas ang pagdudang posibleng natagak kini ug na-trauma ang lawas. Apan kadaghanan sa mga molupyo nagduda dayong gibalbal sa ungo ang bata kay dunay dugo nga nakit-an sa atop sa silingan sa pamilyang Malakay diin giingong nadunggan ang tingog sa ‘kikik’ nga sa tinuohan abyan sa ungo.

Si Sr. Supt. Patrocinio Comendador, hepe sa kapulisan sa probinsya sa Sugbu sa pakighinabi sa mga tigbalita nagkanayon nga dili siya motuong gikaon sa ‘ungo’ ang bata apan motuo siyang dunay ungo.

Si Tarucan ug Pablo nga nahinabi sa Banat News mibutyag nga duna silay nahipos nga report nga ang ulahing insidente maoy ikatulo na nga hitabo.

Sa milabay’ng lima ka tuig usa ka puya ang namatay diha sa barangay Tanke diin ang maong puya giingong gibalbal ug nasundan kini sa milabay’ng tuig nga usa ka puya usab ang giingong namatay sa balbal. (BANAT NEWS)