Imported nga pabuto gisakmit

CEBU, Philippines - Kapin sa P10 mil nga kantidad sa mga pabuto ang nasakmit atol sa gihimong pagpangronda sa Firearms Explosives Security Agency Guards and Supervisory Section (FESAGSS)-7 sa duha ka tindahan kagahapon sa udto diha sa Carbon area sa Barangay Ermita ning dakbayan kagahapon.

Ang mga nasakmit nga imported nga pabuto naglakip sa great bawang, glamour infinite 25 shots, wish light nga may marking made in Bulacan, cross fire, quality goods ug super cracker.

Ang ubang mga tindahan daw nakabantay sa tuyo sa kapulisan daling nanago sa ilang mga baligyang imported nga pabuto.

Si Supt. Rex Derilo, hepe sa FESAGSS nagkanayon nga nimenus karun ang namaligya og mga pabuto diha sa Carbon area. Iyang giklaro nga nakalapas sa R.A 7183 ang tag-iya sa duha ka tindahan sanglit wala silay permit gikan sa hepe sa kapulisan dinhi sa Central Visayas ug gawas pa ang gitugot nga lugar diha sa South Road Property (SRP) mao ray baligyaanan sa mga pabuto nga dunay lisensya.

Gihangyo ni Derilo ang mga negosyanteng namaligya og mga pabuto nga molukat og lisensya diha sa buhatan ni PRO-7 Chief Supt. Marcelo Garbo kinsa maoy mohatag og permit nga makabaligya sila og mga pabuto karung nagkaduol nalang ang Pasko ug pagsugat sa Bag-ong Tuig.

Gipasalig ni Derilo nga magpadayon ang ilang pagpangronda sa mga manindahay og pabuto diha sa Carbon Area ug uban pang lugar sa Metro Cebu.

Iya usab gipahibawo nga moabot na ngadto sa 218 ka mga negosyanteng miduol sa ilang buhatan ug nagdalag mga rekisitos alang sa ilang pagpamaligya og pabuto. (BANATNEWS)