CEBU, Philippines - Gibutyag ni Mayor Michael Rama kagahapon nga andam ang siyudad sa Sugbo nga modonar og P5 milyones gikan sa calamity fund sa siyudad alang sa mga biktima sa grabeng pagbaha didto sa Iligan ug Cagayan de Oro.
Nagkanayon ang mayor nga duna pay nahibilin nga P11 milyones nga calamity fund karong tuiga ang dakbayan busa iyaha kini nga isugyot sa iyang mga kaubanang opisyales nga mogahin og hinabang alang sa mga biktima sa grabeng pagbaha.
Mipasiugda usab karon ang kagamhanan og relief campaign kung diin ilaha nga katambayayong ang ubang mga pribadong sektor.
Ang makuha nga mga donasyon ipadala sa Iligan ug Cagayan karong Disyembre 23 samtang sa Disyembre 30 alang sa katapusang batch ug mopadala usab karong semanaha og rescue ug disaster team ang siyudad sa maong mga dapit.
Ang “mobile morgue” ipadala usab sa maong dapit aron makatabang kini sa saktong paghipos sa mga patay nga lawas, ang maong ‘mobile morgue’ mao ang gigamit sa mga DNA experts atol sa pag-ila sa mga namatay sa nalunod nga barkong Princess of the Stars tulo ka tuig na ang nakalabay.
Nanawagan usab karon ang mayor sa publiko nga sa pagdonar og mga canned goods, bottled water, unlan, habol , bugas ug uban pa nga maoy gikinahanglan karon sa mga biktima sa baha.
Samtang ang public information officer sa dakbayan sa Sugbo nga si Carlo Dugaduga mipahibalo usab nga motabang usab sa pagkolekta og donasyon ang grupo nga iyang gipangulohan nga Cebu Association of City and Municipal Public Information Officers (CAOCAMPIO).
Ang Jaycees International mohimo usab og Concert for a Cause sunod semana diin imbitahon nila ang pipila ka mga ilado nga banda sa siyudad ug ang ibayad sa motan-aw mao ang ilang mga donasyon
Samtang gimando ni Gob. Gwendolyn Garcia sa Provincial Social Welfare and Development Office (PSWDO) sa pagpakigtambayayong sa lokal nga kagamhanan sa dakbayan sa Cagayan de Oro ug Iligan aron masuta ang ilang panginahanglan.
Tubig nga mainom ang gikatahong maoy dinaliang panginahanglan karon sa katawhan sa maong dapit hinungdan nga gimandoan ni Garcia ang PSWDO sa pagpamalit og binotelyang tubig.
Buot si Garcia nga mapadala dayun ang maong hinabang bisan unsang orasa gikan karon ug gani ang tag-iya sa Gothong Lines nga si Bob Gothong mitanyag na nga ipagamit ang ilang mga barko sa paghatud sa mga hinabang.
Gawas sa tubig, sumala pa ni Garcia nga mosunod usab ang ubang hinabang sama sa mga kagamitan sa panimalay, pagkaon ug salapi. (BANATNEWS)