Masuso 'Gibalbal' patay

CEBU, Philippines - Usa ka batang bag-ohay lang natawo ang gikatahong gibalbal human kini napalgang nagkadugo ang baba, ilong ug pusod pasado alas-5 sa kaadlawon kagahapon sa sitio Magay barangay Tangke syudad sa Talisay.

Si John Edison Malacay, nga napulo pa ka adlaw gikan natawo gideklarar nga dead on arrival diha sa Talisay District Hospital.

Sa inisyal nga imbestigasyon sa kapolisan nasayran nga ang ginikanan sa bata nga silang Kimberly ug Joely nakamata sa diha nga gipukaw sila ni Virgil Abarquez ang amahan ni Kimberly tungod sa nagpasad nga mga dugo sa kusina ug sa ilang banggerahan.

Tungod niini gisusi kini ni Kimberly samtang nagkugos sa iyang anak apan mao nalay nakakugang kaniya nga kalit kini misunggo ug nanggawas ang dugo sa ilong niini hinungdan nga ang amahan nga si Joely daling nangayo og pakitabang ug gidali pagdala ang bata ngadto sa tambalanan.

Apan gideklarar kini nga patay na pag-abot.Sa pagsusi sa lawas sa bata nagkadugo usab ang pusod niini, ang nakapahibulong sa mga awtoridad kay walay bisan usa ka timailhang gituyo ang pagpatay niini.

Matud pa ni Alex Manabat sa Talisay Police, sa diha nga nahinabi sa Banat News nga sa mga estorya sa katawhan sa nahisgutang lugar gikatahong adunay “kwi” nga nagtingog nianang wala pa mahitabo sa bata ang pagdugo.

Sa pagsusi usab sa mga tawo diha sa atop sa silingang balay sa pamilyang Malacay giingong adunay lama sa dugo nga ilang nakita. Hinungdan nga mitumaw karon ang pagdudang gibalbal gyud ang bata.

Apan ang kapolisan mirekomendar nga kini ipaubos lang gayud sa otopsiya kini aron masayran og unsa ang hinungdan sa kamatayon sa bata.

Samtang ang Scene of the Crime Operatives nakigkoordinar usab tungod kay gitahasan kini nga e-match ang dugo nga nagkatag kun dugo ba kini sa tawo ug dugo ba kini sa maong bata.

Sa laing bahin, ang chief of hospital sa Talisay City District Hospital Dr. Agustin Agos mibutyag sa Banat News nga maglisod na sila og hatag og eksplinasyon sa kamatayon sa bata tungod kay nagdumili man ang mga ginikanan sa pagpaubos niini og laboratory test. Mipasabot si Agos nga maayo unta og didto kini namatay sa ilang tambalanan kay ila pang masuta kun unsa gayud ang hinungdan sa kamatayon niini.

Apan nagduda si Agos nga usa sa mga posibleng hinungdan sa kamatayon sa bata mao nga posibleng natagak kini nga makamugna og trauma sa lawas nga moresulta sa pagdugo, ikaduha mao ang kakulang sa vitamin K kini kun gianak ang maong bata sa balay lang.

Giklaro ni Agos nga hangtud wala maawtopsiya ang lawas sa bata dili nila matino kung unsay gikamatyan niini.

Samtang igo lang usab nga mikatawa si Agos kalabot sa pangangkong gibalbal ang bata. “Uso pa diay na karun nga balbal?”.(Uban sa report ni Rey Pasaporte/EIM) (BANATNEWS)