Seguridad gihigpitan

CEBU, Philippines - Higpit nga gibantayan sa kapolisan ang mga dapit sa Sugbo diin magtapok ang bagang tawo niining panahon sa pagsaulog sa Pasko nga naglakip sa simbahan nga motambong sa Misa de Gallo sa matag kaadlawon, mga malls, terminals sa mga sakyanan, pier area, Mactan Cebu International Airport Authority (MCIAA), mga vital installation nga sama sa 1st Mactan Mandaue Bridge, Marcelo Fernan Bridge,   mga oil depot ug uban pa.

Si retired police superintendent Melvin Gayotin nga maoy head security officer sa MCIAA miingon nga higpit nilang gipatuman ang hugot nga pagbantay sa nahisgotang tugpahanan sanglit gilauman na man nila daan ang pagdagsang sa daghang pasahero gikan sa lainlaing kanasuran nga moanhi dinhi sa Sugbo.

Nunot niini gipahimangnoan ni Gayotin ang mga sumasakay og taxi gikan MCIAA sa pagtaho gilayon sa iyang buhatan sa higayon nga makasinati og suliran sama sa mahibinlan og butang, bag, cellphone ug uban pa sanglit hatagan gilayon kini nila og pagtagad nga mahibalik kini ngadto sa hingtungdan nga tag-iya niini.

Si SPO2 Rodito Viovicente, Police Community Relation Officer (PCR) sa Lapulapu Police Office (LLCPO) miingon nga higpit nila nga gipatuman ang seguridad sa katawhan sa maong dakbayan nga naglakip na niini ang Mulle Osmeña sa barangay Poblacion ug uban pa.

Dugang pa niya nga giabagan ang ilang kalihokan sa mga barangay tanod nga naglakip na sa Unified Task Force, Barangay Public Safety Officer (BSPO) mga sakop sa tourist police ug uban pa.

Samtang si Inspector Rex Lomente, Investigation Detection and Management (IDMB) sa Mandaue City Police (MCPO) miingon nga gipakatap usab nila ang kapolisan sa tibuok dakbayan.

Dugang pa niya nga may mga uniformed police ug mga wala mag-unipormeng mga polis sa pagsiguro nga ang mga dautang elemento sama sa mangunguot, kawatan, tulisan dili makasiaw.   EIM   - (BANAT NEWS)