CEBU, Philippines - Gipusil patay ang usa ka tanod nga nagbantay sa gipahigayong disko didto sa bukirang bahin sa barangay Santikan siyudad sa Danao niadtong miaging adlaw sa sayong kaadlawon.
Ang biktima nga natusak sa samad pinusilan mao si Flavio Perez, 38, tanod sa maong lugar samtang pabilin pang blangko ang kapulisan pagtumbok sa mamumuno niini atol sa paghimo ning balita.
Matud ni SPO2 Ildefonso Prosia, desk officer sa Danao City Police Station dihang nahinabi sa Banat News nananghid ang biktima sa mga kaubang tanod nga mangihi ug migawas kini sa diskohan.
Apan pag-abot niini sa ngitngit nga lugar sa luyong bahin sa eskwelahan nga dili layo gikan sa diskohan milanog ang sunod-sunod nga buto sa armas ug dihang namingaw na gisusi sa mga tanod kun diin gikan ang buto ug mao nalay ilang naabtan ang kauban nga nagbuy-od na sa yuta.
Sa pagsusi sa kapolisan sa biktima aduna kini samad pinusilan sa ulo ug laing lima ka samad pinusilan sa iyang bukobuko, nakuha usab diha sa crime scene ang tulo ka kabhang sa bala sa kalibre .9mm ug laing usa ka deformed slug nga gituohang gikan sa armas sa mga mamumuno. - (BANAT NEWS)