Batan-on gipaulanan og bala

CEBU, Philippines - Samad pinusilan sa nagkadaiyang parte sa kalawasan ang hinungdan sa kamatayon sa usa ka batan-on diha sa barangay Cansaga sa lungsod sa Consolacion sa milabay’ng kaadlawon.

Ang biktima mao si Kevin Mata, 21, residente sa sitio Cambiyohan sa barangay Casili lungsod sa Consolacion.

Sa imbestigasyon sa kapolisan nasuta nga mga alas 12:30 sa kaadlawon si Mata uban sa iyang mga higala naglakaw sa maong dapit dihang kalit lang mibutho ang usa ka motorsiklo ug ang mga sakay mipusil kanila.

Samtang nagkatibulaag sila nahibulong ang mga kauban ni Mata nga siya lamang ang gisentro sa duha ka mga tawo nga luwan sa maong motor.

Dihang nakapalayo na ang mga gikatahapan dali nilang gidala sa tambalanan si Mata apan patay na kini pag-abot didto.

Sa pasiunang pakisusi sa kapolisan sa Consolacion nasuta nga adunay relasyon sa bangi sa fraternity ang maong insidente ug ila usab gisusi kung nalambigit ba sa usa ka grupo si Mata o ang mga kaubanan niini.   - (BANAT NEWS)