38 ka pamilya magpaskong way balay

CEBU, Philippines - Nag-atubang sa mapait nga Pasko ang 38 ka panimalay sa dalan P. Remedio, sitio Veto, barangay Banilad, dakbayan sa Mandaue human sa kalit nga pag-ulbo sa sunog alas 11:53 ang takna sa miaging Domingo sa gabii.

Si FO3 Cefriano Codilla Jr., imbestigador sa Bureau of Fire Protection (BFP) sa maong dakbayan nga nahinabi sa Banat News miingon nga nagsugod ang kalayo sa poste kuryente nga sa sayo pa giingong nagkilabkilab ang kalayo.

Dangtan pila ka gutlo mitapon kini ngadto sa panimalay ni Imelda Sarabosing nga ginama sa light materials ug gikan didto mitapon kini sa mga kasikbit nga kabalayan nga pulos usab ginama sa gaay.

Matud pa ni Codilla nga si Mandaue City Fire Marshall Rogelio Bongabong mipaubos sa 3rd alarm sa maong sunog nga maoy hinungdan sa pagtubag usab sa mga silingan pa nga kabomberohan nga naglakip sa dakbayan sa Sugbo, Consolacion ug dakbayan sa Lapulapu.

Nakontrolar kini sulod sa duha ka minutos gikan sa ilang pagpasirit og tubig, swerteng daplin ra sa dalan ang dapit nga nasunog maong nakabuylo ang mga bombero sa ilang operasyon.

Gitug-an usab niya nga ang maong poste nga ilang gituohang   maoy nakaingon sa pag-ulbo sa sunog makadaghan na nilang gialarma nga iya sa Visayan Electric Company (VECO).

Gibanabana ni Codilla nga nagkantidad og P342, 000 ang danyos sa maong sunog ug walay gikatahong naangol o kinabuhing nakalas sa maong sunog nga nahitabo.    - (BANAT NEWS)