1,600 bata imbitado sa Pasko sa Uptown

CEBU, Philippines - Moabot ngadto sa 1,600 ka mga kabos nga bata gikan sa 33 ka pinili nga mga barangay sa siyudad sa Sugbo ang maghugop karong hapon diha sa Fuente Osmeña Circle aron makadawat sa ilang gasa nga gitampo gikan sa mga pribadong sektor.

Usa sa mipaluyo sa maong kalihukan mao ang kagamhanan sa siyudad sa Sugbo kung diin gitawag nila kini og “Pasko sa Uptown.”

Ang executive director sa maong proyekto nga si Billy Hillditch nga ikaupat na kini ka tuig nga gihimo nila ang nahisgutang kalihukan uban sa kooperasyon sa mga opisyales sa barangay nga maoy nag-screen sa mga bata.

Sumala pa ni Hillditch dunay mga establisamento ug mga pribadong tawo ang nagpaluyo sa paghatag og mga pinaskohan alang sa mga bata.

Matud pa niya nga usa sa hinungdan sa Pasko mao ang pagpaambit sa nadawat nga mga grasya ngadto sa atong isigkatawo.

Ang mga sakyanan sa barangay maoy gitahasan nga mohatud ug kuha sa mga bata nga apil sa maong kalihukan.

Matud pa niya nga taas-tas nga panahon ang ilang pagpangandam niini ilabi na nga 33 na ka barangay ang ilang giserbisyohan dili sama sa milabay nga mga tuig nga ang mga bata naggikan lang sa 11 lang ka mga barangay.  - (BANAT NEWS)