Sugbo ug Busan, South Korea managsuon na

CEBU, Philippines - Hingpit na ang pagkamanagsuon sa probinsiya sa Sugbo ug Metropolitan City of Busan, South Korea human ka pirmahe ang Memorandum of Sisterhood Agreement (MOA) tali ni Governor Gwendolyn Garcia ug Mayor Hur Nam-Sik sa Busan didto sa plenary hall sa Cebu International Convention Center (CICC) sa siyudad sa Mandaue niadtong Biyernes sa gabii.

Misaksi sa maong kalihukan mao ang mga miyembro sa hunta probinsiyal sa Sugbo nga gipangulohan ni Vice Governor Agnes Magpale ug delegasyon sa Metropolitan City of Busan Council.

Si Hur mitug-an pinaagi sa iyang interpreter nga ang kasabotan tali sa Busan ug sa probinsiya sa Sugbo usa ka "historic event" sanglit labing una kining higayon nga nakigsuod ang Busan og lain laing lugar.

Matud pa ni Hur nga makaayo kaayo sa duha ka lugar ang maong kasabotan tungod kay daghan kini og masaw-an nga kalambuan sa natad sa ekonomiya ug panginabuhi bisan sa inprastraktura.

Si Hur mibisita usab sa mga tourist destination sa Sugbo kuyog sa iyang delegasyon ug una nilang gisud-ong ang dancing inmates sa CPDRC, dayon ang Museo Sugbo ug uban pa. Wala sila kapugong sa pagpalanog sa ilang mga pagdayeg gumikan sa nakita nilang maayong liderato sa kasamtangang gobernador sa lalawigan.

Dugang niini, si Hur nagkanayon nga dili siya mahibulong nga daghan ang mga langyaw nga turista nga moanhi sa Sugbo tungod sa mga maayo ug nindot nga mga suroyanan sa mga turista dinhi sa lalawigan.

Samtang si Gobernador Garcia miingon nga daan nang nagdugtong ang Sugbo ug ang Busan, bisan pa niadtong wala pa ang memorandum of understanding gumikan sa direktang mga biyahe sa eroplano gikan dinhi paingon sa naasoy nga siyudad.

Makahuloganon usab ang paglagda sa MOA sa makasaysayanong CICC nga mao ang dapit nga saksi sa palambo sa maayong dungog sa lalawigan sa Sugbo ngadto sa gawas sa nasud.

Human sa pinirmahay si Garcia ug Hur nagdungan sa pagpasiga sa higanting christmas tree sa gawas nga bahin sa CICC nga may gitas-ong 120 ka tiil. (BANAT NEWS)