85-anyos naghikog

CEBU, Philippines - Patay nang nagbitay dihang nakaplagan ang usa ka lolo human kini gikatahong nakabikil ang usa sa mga kaliwat tungod sa yuta sa sitio Ilaya barangay Panalipan lungsod sa Catmon sa miaging kaadlawon pasado alas singko.

Ang naghikog nailhan nga si Isaac Luardo, 85, molupyo sa maong lugar kinsa giingong naghikog ginamit ang usa ka pisi. Sa pakighinabi sa Banat News ni PO2 Arnel Pruta sa Catmon Police Station, misaysay kini nga sa wala pa mahitabo ang maong paghikog daan nang nanganti si Luardo nga magkutlo sa iyang kinabuhi.

Matud pa ni Pruta nga base sa ilang nakuhang impormasyon nga adunay mga parte sa kabtangan ni Luardo nga gikatahong giawayan sa mga kabanay niini.

Midugang usab si Pruta nga aduna usab sila’y nakuhang impormasyon nga pipila ka kaliwat ni Luardo ang gikabikil tungod usab sa yuta.

Nasayran nga si Luardo nakit-an sa iyang pag-umangkon nga si Joveniana nga nagbitay na kini sulod sa ilang panimalay nga ang liog may higot nga pisi samtang ang pikas tumoy niini gihigot ngadto sa ibabaw.

Matud ni Pruta nga usa ka ulitawong gulang si Luardo ug may kayutaan ug kalubihan. (BANAT NEWS)