Aso sa pabuto makamatay

CEBU, Philippines - Gipahimangnoan sa kagamhanan ang publiko sa paglikay nga makahanggap sa aso sa mga pabuto karong Pasko ug Bag-ong Tuig tungod sa mga modernong kemikal nga gisambog sa pulbora sa pabuto makamatay.

Ang maong pasidaan maoy unod sa resolusyon nga gipangamahanan ni 6th District Provincial Board Member Arleigh Sitoy nga   nag-awhag sa katawhan nga magmatngon sa mga aso sa pabuto tungod sa kapeligro niini.

Matud pa ni Sitoy sa iyang resolusyon nga ang aso sa mga pabuto nga masimhot sa tawo usa ka “health hazard” tungod sa kemikal niini nga mohatag og nagkadaiyang sakit sa lawas.

Pipila niini mao ang hubak, pagkalipong, labad sa ulo, hanap nga panan-aw, pagtaas sa dugo ug uban pa nga sakit.

Gibutyag   usab ni Sitoy nga ang ilang responsibilidad isip mga alagad sa publiko mao ang pagprotehir sa ilang kinabuhi pinaagi sa paghatag sa mga basic heath services.

Apan kun ang pagpabuto gitugot man sa gobyerno wa kini magpasabot nga ipagusbat sa kagamhanan ang lawas sa katawhan kundili anaa na sa tawo ang paglikay niini kun gusto siyang di siya mamatay dayon.

Sama ra sa panigarilyo nga gitugot sa gobyerno ang pamatigayon og sigarilyo , di tungod aron mamatay og dali ang hinigarilyo kundi ang pagsukod kaniya kun gigamit ba niya ang iyang utok isip tawo aron molikay gikan sa paghikog.

Kini tungod kay ang tawo nga may pagmahal sa iyang kinabuhi, mogamit sa iyang utok aron likayan ang pagsuyop sa aso nga makadaot sa iyang baga. (/WC)  (BANATNEWS)