CEBU, Philippines - Usa ka Korean national napasakaan og kaso sa hukmanan kay wala makig-areglo kaniya ang pamilya sa tawo nga namatay kay nadasmagan sa iyang sakyanan sa miaging Huwebes sa gabii.
Si Chong Choi, 60, nagpuyo sa barangay Pajac, dakbayan sa Lapulapu nagtingkagol na karon sa prisohan sa Talisay misuway paghangyo sa pamilya sa namatay nga si Ernesto Sarol, 38, nga taga Tonggo , lungsod sa San Fernando.
Si Inspector Ricardo Echavez, hepe sa traffic division sa dakbayan sa Lapulapu mibutyag sa Banat News kagahapon nga ang kaluha ni Sarol nga si Asuncion Sarol miadto sa ilang buhatan niadtong Biyernes sa buntag ug mipadayag nga miuyon kining makig-areglo sa suspetsado nga si Choi.
Apan nianang pagkahapon sa maong adlaw mitungha ang asawa ni Sarol nga si Gemma ug uban nilang paryente ug mibutyag nga ipadayon nila ang pagsang-at og kaso batok sa Koreano kay dili sila makig-areglo.
Matud ni Echavez nga si Choi napasakaan gyud og kasong reckless imprudence resulting to homicide niadtong Biyernes sa hapon diha sa piskaliya sa siyudad ug nagtingkagol siya karon sa Talisay City detention cell.
Nasayran nga si Choi nagmaneho sa iyang Sports Utility Vehicle paingon sa dakbayan sa Sugbo gikan sa habagatan dihang kalit kining miliko paingon sa wala pag-abot niya sa eskina sa Lawaan I.
Si Sarol nga gikan sa dakbayan sa Sugbo paingon sa habagatan wala makabantay sa kalit nga pagliko ni Choi hinungdan nga nagkadinasmagay ang iyang motor ug ang sakyanan sa Koreano nga maoy hinungdan sa hinanali niyang kamatayon. (BANATNEWS)