Polis, asawa napaig

CEBU, Philippines - Patay ang usa ka polis nga gikatakda na untang moretiro tapos ning tuiga ingon man ang asawa niini ug naangol pa ang tulo nila ka mga sakop sa pamilya sa sunog nga nitumaw didto sa Mabini St . , Poblacion siyudad sa Danao niadtong Biyernes sa alas 11:45 sa gabii nga niugdaw og duha ka panimalay.

Ang namatay human ma-trapped sulod sa ilang kwarto mao si SPO2 Felix Matbagon, nadestino sa Danao City Police ug ang iyang asawa nga si Liza Matbagon.

Samtang naangol ang ilang anak nga si Liza Matbagon Hermenanda, 32, minyo ug bana niini nga si Antonio ug ang ilang 2- anyos nga anak nga si Izel.

Apil sa nasunog mao ang balay sa ilang silingang gipanag-iya ni Manolo Angeles.

Gibanabana sa kabomberohan sa dakbayan sa Danao nga mitala og P500 mil ang kinatibuk-ang danyos sa maong sunog nga nagsukad sa pinuy-anan sa pamilyang Matbagon.

Matud ni SPO4 Edgar Gomez, desk officer sa Danao City Police dihang nahinabi sa Banat News nga samtang nangatulog ang tibuok sakop sa pamilya kalit lang miulbo ang sunog ug wala makabantay ang magtiayon hinungdan nga na-trap sud sa ilang lawak.

Maayo nalang gani kay nakamata sila si Liza ug bana niining si Antonio nga diha sa pikas kwarto ug daling nakagawas hinungdan nga napaso ang tiil nila ug lawas apil na ang 2-anyos nilang anak.

Daling nikaylap ang kalayo sa sikbit nga panimalay ni Angeles ug milanat gyud og 50-minutos una pa hingpit nakontrolar sa mga sakop sa kabomberohan ang               sunog.

Ang kabomberohan sa Danao sa paghimo ning balita padayun pang nag-imbestigar kung unsay sinugdanan sa maong sunog.

Dugang ni Gomez nga si Matbagon wala na kini mo-duty pa tungod kay nag-asikaso na kini sa iyang mga papeles alang sa iyang pormal nga pagretiro sa serbisyo karun untang katapusan ning tuiga.(/EIM) (BANATNEWS)