Publiko giawhag magmabinantayon

CEBU, Philippines - Gipasidan-an sa hepe sa kapolisan sa dakbayan sa Talisay ang publiko nga magmabinantayon kanunay aron dili mabiktima sa mga tawong badlongon ilabi na niining pagsaulog sa Pasko ug Bag-ong Tuig.

Si Recamara sa pakighinabi sa Banat News nagkanayon niining mga panahona modas-ag usab ang nagkadaiyang krimen sama sa panguot, pangilad, panulis ug uban pa, busa kinahanglang magpakabana ang tanan.

Matud niya nga nauso na usab karon ang pagpadala og kwarta pinaagi sa electronic money transfer ug bantayanan kaayo kini sa publiko 

Hinuon ang kapolisan kanunay’ng nagpatrolya sa kadalanan sa siyudad busa angay nga dili magpanuko ang publiko sa pagduol sa maong mga polis kung nagkinahanglan sila og tabang.

Sa laing bahin gitukod ni Recamara ang tulo ka night watch team sa kapolisan nga gitahasan sa pagsuroy-suroy sa nagkalainlaing suok sa syudad panahon sa kagabhion ning panahon sa Pasko.

Kini naglangkob sa lima ka mga miyembro sa Talisay City Intelligence Bureau (TCIB) ug usa ka polis nga maoy mangulo kanila.

Ang maong night watch team maoy pabantayon sa   mga simbahan, sa mga establisamento nga may transaksiyon bahin sa kwarta ug sa mga establisamento nga abli sulod sa 24 oras. (BANAT NEWS)