CEBU, Philippines - Patay ang usa ka drayber sa motorsiklo human kini modasmag sa usa ka sports utility vehicle (SUV) didto sa barangay Lawaan I, dakbayan sa Talisay niadtong Huwebes sa gabii.
Ang biktima mao si Ernesto Sarol, 38, taga barangay Tonggo, sa lungsod sa San Fernando, samtang ang drayber sa SUV nga Hyundai mao si Chong Choi, 60, usa ka Korean national , nga nagpuyo sa barangay Pajac, dakbayan sa Lapulapu.
Base sa imbestigasyon sa kapolisan sa traffic division nasayran nga si Sarol nagmaneho sa iyang Honda nga motorsiklo nga may plaka nga 4306-YY paingon sa habagatan gikan sa dakbayan sa Sugbo.
Dihang pag-abot sa maong lugar kalit lang midasmag ang biktima sa sakyanan sa Koreano samtang ang duha pulos nagbaguros sa kakusog ang dagan.
Gumikan sa kakusog sa maong pagkabangga nalagpot ang biktima gikan sa iyang motorsiklo ug pagtugpa niini sa sementadong karsada nabali-bali ang kalawasan nga maoy hinungdan sa iyang pagkamatay pipila ka oras human sa maong hitabo
Hinuon walay plano ang pamilya sa biktima nga mosang-at og kaso batok sa Koreano. (/WC)(BANAT NEWS)