Naninghag sa sikyu napusilan patay

CEBU, Philippines -  Gipusil ang usa ka checker ug time keeper sa usa ka construction site human kini pusila sa gikalalis nga gwardiya sa iyang gitrabahoan sa miaging hapon diha sa dalan F. Gonzalez ug Lincoln St., sa barangay Ermita siyudad sa Sugbu.

Si Diomar Searez, 20, lumad nga taga Maragusan, Davao City apan stay-in sa construction site sa Philboard Building nakaangkon og duha ka samad pinusilan sa tuo ug walang bahin sa iyang lawas nga maoy hinungdan sa iyang hinanali nga kamatayon.

Ang giingong mipusil kaniya mao si Joel Rentoma, 33, taga barangay Bolinawan dakbayan sa Carcar ug sakop sa RSA Security Agency.

Segun sa pasiunang imbestigasyon nga gihimo nilang PO3 Geoffrey Gutual, PO2 Lou Pagara, PO2 Julius Regis ug PO2 Erwin Pequero sa Homicide Section sa Cebu City Police Office (CCPO) nagbutyag nga nag-atiman ang biktima sa trak de kargang puno sa mga semento dihang gitawag kini sa suspek.

Sumala pa nga wala makauyon ang biktima sa paagi sa suspek pagtawag kaniya nga daw naninghag ug nakamenus kaniya hinungdan nga nagkatinubagay ang duha apan ang suspek mibunot sa iyang .38 rebolber ug gipusil ang biktima.

Bisan samaran na ang biktima nakahigayon pa og dagan apan gigukod sa suspek ug gitiwasan pagpusil. Ang mga kaubanan sa duha daling midala kang Searez ngadto sa Cebu City Medical Center (CCMC) apan patay na kini.

Ang suspek nadakpan sa mga barangay tanod nga gipangulohan ni Carlito Gallardo.

Naa na karon sa Homicide Section ang suspek ug ang service firearm nga may upat ka buhing bala ug duha ka kabhang sa tambor niini nga maoy gigamit sa pagpamusil sa suspetsado.

 “Kato ra gyud iyang estorya nga hambogeroa nimo, unsay imong gisaligan huboa nang imong uniporme unhan tika ron,” batbat pa ni Rentoma bahin sa gisinghag kaniya sa biktima.

Giklaro niyang dili siya maoy nanguna og singhag sa biktima ug tungod sa bahad sa biktima giunhan niya kini pagpusil. (BANAT NEWS)