Lider sa gang tulisan, killer

CEBU, Philippines - Nasikop sa kapolisan ang lider sa gang nga nag-atubang og kasong pagpanulis ug pagpatay sa barangay Inayawan, siyudad sa Sugbo.

Si Wilbert Mayola, 19, alias Tateng,Threze, Betoy, ug Jerks, ang lider sa True Brown Style nga kauban gihapon sa Bloods Gang gidakop sa mga sakop sa City Intelligence Branch (CIB) sa Cebu City Police Office (CCPO) sa miaging hapon didto sa ilang pinuy-anan sa sitio Dawis sa barangay San Roque sa dakbayan sa Talisay.

Gipangulohan ni Chief Insp. Romeo Santander, hepe sa CIB kinsa armado og warrant of arrest (WOA) nga giluwat ni Judge Gilbert Moises sa Regional Trial Court (RTC) branch 18 sa dakbayan sa Sugbo.

Subay sa record sa kapolisan nasayran nga si Mayola maoy gitumbok sa mga saksi nga maoy mipusil patay kang Mark Saavedra ug miangol sa laing kauban niini nga sila si Lennel Villagonzalo ug Marx Cartalla. Gitulis sa grupo ni Mayola ang mga biktima ug si Saavedra nakuhaan sa iyang 6300 nga Nokia ug pagkahuman gipamusil.

Si Saavedra nga maoy nagrabihan nakabsan gyud sa iyang kinabuhi samtang ang duha ka mga kaubang samaran naluwas sa kamatayon.

Gitug-an ni Mayola nga nalambigit siya sa pagpamusil sa barangay Tabunok duol sa balay sa konsehal sa dakbayan sa Talisay.

Matud ni Santander si Mayola gawas nga maoy lider sa ilang gang mao usab ang triggerman sa ilang grupo.

Gani makig-alayon sila sa Pardo Police station ug Talisay City Police Station kay ang grupo ni Mayola maoy responsabli sa mga pagpanulis nga nahitabo sa barangay Pardo, Quiot ug uban pang barangay sa dakbayan sa Talisay ingon man nalambigit usab kini sa drive by shooting ug motorcycle in tandem sa maong mga lugar diin ang ilang kaatbang sa gang maong ilang target sa pagpamusil.

Giawhag ni Santander ang ubang mga saksi nga mopatim-aw sa ilang buhatan ug ilhon si Mayola aron idugang isip saksi sa pagpasaka og kaso batok sa suspetsado. (BANAT NEWS)