CEBU, Philippines - Ang Cebu City Regional Trial Court wala moapil sa court holiday nga agi og simpatiya sa Korte Suprema tungod sa pagpa-impeach kang Supreme Court Justice Renato Corona sa Kongreso sa miaging adlaw.
Ang mga huwes sa Sugbo atol sa maong adlaw (Miyerkules) wala mosuon sa gihimo sa ubang mga korte sa nasud nga wala motrabaho agi og pagpakita og suporta kang Corona.
Ang Cebu City RTC mihusay gihapon sa ilang naka-schedule nga hearings bisan pa man og nakadawat sila og text gikan sa kaulohan nga nag-awhag og court holiday.
Si Belinda Go nga bise presidente sa Philippine Association of Court Employees in Cebu mibutyag nga bisan nakadawat siya og text message nga nagpahibalo nga adunay court holiday wala sila mosanong niini.
Hinuon nagsul-ob sila og itom agi og pagpakita sa ilang hilom nga pamaagi sa pagprotesta. “We still do our duties, but as a sign of support we are wearing black t-shirts,” pasabot pa ni Go.
Ang presidente sa Integrated Bar of the Philippines (IBP) Cebu City Chapter Atty. Earl Bonachita mipadayag nga ang court holiday nagresulta sa kalangay sa husay sa mga kaso diha sa korte.
Hinuon wala niya gikwestyon ang baruganan sa mga kawani sa korte tungod kay usa kini ka pamaagi aron ilang mapakita ang ilang katungod.
Samtang ang kanhi presidenti sa IBP nga si Atty. Alex Tolentino, miuyon usab sa gibutyag ni Bonachita kini tungod kay ang ilang mga kliyente maoy naalaot.
Sa laing bahin, ang kanhi Executive Judge Miendrado Paredes sa RTC mibutyag nga adunay gipahigayong survey kalabot sa impeachment ni SC Justice Renato Corona kung unsay implikasyon sa maong isyu diha sa hudikatura.
Matud pa sagad sa mga huwes miingon nga makadaot sa hudikatora ang impeachment. (BANAT NEWS)