Kabarangayan pabutanga'g firecracker zone

CEBU, Philippines - Gipahimangnoan sa lokal nga kagamhanan sa siyudad sa Sugbo ang mga opisyales sa 80 ka barangay nga kinahanglang mobutang gyud sila og saktong firecracker zone alang sa ilang mga konstituwente nga buot magpabuto atol sa pagsaulog sa Pasko ug Bag-ong Tuig.

Kahinumduman nga ang Department of Environment and Natural Resources (DENR) mipagawas og mga lagda kabahin sa pagpataka og pabuto sa bisan asa nga dapit gumikan kay mosamot ang pagsaka sa polusyon nga matampo niini sa hangin.

Ang gipasar nga resolusyon ni Konsehal Nida Cabrera nag-awhag sa kabarangayan nga magbutang gyud og saktong lugar diin mahimong makapabuto aron malayo sa disgrasya ang mga tawo. Midugang si Cabrera kinsa chairman usab sa committee on environment sa konseho nga mosaka ang gidaghanon sa magpabuto samtang nagkaduol ang adlaw sa Pasko ug dili ikalimod nga makamugna kini og polusyon.

Samtang si Mayor Michael Rama mipasidaan sa publiko nga magmabinantayon kanunay sa pagpabuto aron dili maamong ang ubang tawo.

Gibuksan na kagahapon ang 80 ka mga stalls sa baligyaanan og pabuto sa South Reclamation Project diin luwas sa peligro ang mamalit ug aduna pay gipasupot nga kalingawan nga gidalit ang dakbayan nga mahimong hapiton og tan-aw diha sa maong lugar. (BANAT NEWS)