CEBU, Philippines - Andam na ang tanang mga parokya dinhi sa alang sa unang adlaw tradisyonal nga Misa De Gallo o Simbang Gabi karong kaadlawon.
Mga simbahan sa Sugbo ilabi na ang Cebu Metropolitan Cathedral ang mihimo og grabeng preparasyon kagahapong adlawa alang sa pagsugwak unya sa mga manimbahay karon.
Si Rt. Rev. Fr. Roberto Alesna, ang parish priest sa cathedral nagkanayon nga daghang kausaban ang ilang gibuhat sa simbahan lakip na ang pagpalambo sa sound system ug pagbutang og wide screen aron makakita ang mga anaa sa gawas.
“Again, for this year’s Misa De Gallo, we anticipate nga starting tomorrow magsugwak ang mga manimbahay ug atong buhaton ang tanan aron komportable ilang pagsimba,” matud pa ni Alesna
Kabahin sa seguridad sa mga manimbahay, gipahibalo ni Alesna nga nakig-alayon na sila sa mga sakop sa Cebu City Police Office ug barangay officials alang sa siyam ka adlaw nga novena agi’g pagsugat sa adlaw’ng natawhan ni Hesu Kristo. Sa laing bahin, si Msgr. Esteban Binghay, Episcopal vicar sa Artsidiyosesis sa Sugbo nagkanayon nga wala pay schedule sa mga simbahan nga misahan ni Archbishop Jose Palma .
“Sa pagkakaron wala pa gyud makapagawas og lista sa mga simbahan nga bisitahon ni Archbishop Palma alang sa Misa De Gallo. Medyo busy pa usab siya, pero atong paabuton,” matud pang Binghay. Si Palma mao usab ang bag-ong natudlong presidente sa Catholic Bishop Conference of Philippines (CBCP). (BANAT NEWS)