Yuta sa Kapitolyo paliton sa taga Lahug

CEBU, Philippines - Aron nga hapsay ug malimpyo ang nagsanga nga karsada sa   Salinas drive extension sa barangay Lahug, ning syudad sa Sugbo, ang mga opisyales sa maong barangay miduol kang Gobernador Gwen Garcia ug mihangyo nga ilang paliton ang luna nga anaa sa palibot sa maong lugar.

Si kanhi kapitan ug karon First barangay Councilor Mary Ann delos Santos sa maong barangay   maoy nangulo sa mga opisyales sa barangay sa paghangyo ni Gobernador Garcia nga ilang pangayoon sa lalawigan o ba kaha paliton ang 361 metros kwadrado nga bakanting luna daplin sa dalan sa junction sa Salinas Drive Extention sa barangay Lahug nga nasulod sa 93-1.

Matud pa ni Delos Santos nga ilang tinguha nga ipahiluna sa maong lote ang satellite market sa barangay aron makatabang kini sa mga kabus nga molupyo sa maong barangay.

Si Delos Santos nagkanayon nga ang una nilang proposal mao nga ilang gihangyo ang gobernador nga idonar na lamang sa probinsiya ang maong lote ngadto sa ilang barangay sanglit ang mga yano ug kabus nga mga vendor mao may makabenepisyo niini.

Apan kun dili mosugot ang gobernador nagkasabot ang mga opisyal sa barangay nga ilang paliton ang maong yuta sa presyo nga ibase   sa gitakda sa 93-1 ordinance sa panahon pa ni kanhi Governor Vicente "Tingting" dela Cerna niadtong tuig 1992.

Kini aron sigurado gyud nga ang barangay makaabot sa presyo sa maong lote ug   mahimo kining satellite market alang sa mga kabus nga manindahay.

Hinuon si   Gobernador Garcia wala pa mohatag og tukmang tubag tungod kay tun-an pa kini sa legal department ug sa mga magbabalaod sa lalawigan.

Apan iyang giawhag ang konseho sa barangay Lahug nga magpadala og sulat   nga pormal sa iyang buhatan aron iya kining ika-presentar sa regular meeting sa Economic Enterprise Council.  - BANAT NEWS