CEBU, Philippines - Gipangita karon sa kapolisan ang wala hiilhing inahan sa usa ka puya nga lalaki nga napalgan alas 2:00 pasado sa miaging kaadlawon nga patay na ug gilabay sa basurahan sa dalan Ompad, barangay Poblacion, dakbayan sa Lapulapu.
Si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga giputos og panapton ang maong puya ug gisulod og karton ug gilabay tipon sa mga basura.
Matud pa ni PO2 Jocotan nga ang mga naghakot sa basura sa barangay Poblacion sa maong dakbayan sayo sa kaadlawon maoy nakadiskobre sa maong puya nga lalaki nga gibanabanang anaa na sa lima ngadto sa unom ka bulan.
Gipahibalo sa mga basurero ang barangay kapitan sa barangay Poblacion ug ilang gidala sa simbahan ang maong bata ug ilang gitugyan ngadto sa city health office alang sa tukmang paghipos sa maong patay’ng lawas sa puya.
Dugang pa ni PO2 Jocotan nga dili nila matataw kun gihilog ba og tuyo ang maong bata sa inahan nga maoy nagsabak niini.
Ilang giawhag ang mga opisyal sa barangay nga panid-an kinsay inahan sa maong bata aron panubagon kini sa balaod. - BANAT NEWS