CEBU, Philippines - Pormal na nga gibuksan kagahapon ang 3rd Cebu City Flower Festival alang sa pag-promote o pagpaila sa mga buwak sa siyudad sa Sugbo.
Kini pinaagi sa usa ka parade nga nanukad sa Fuente Osmeña paingon sa Plaza Sugbo diin nagbaha ang mga float nga gialirongan og mga preskong buwak.
Mikabat sa siyam ka barangay sa kabukiran sa dakbayan ang misalmot sa maong kalihokan nga naglangkob sa Sirao, Babag, Bonbon, Malubog,Taptap, Adlaon, Busay, Pung-ol Sibugay ug Guba.
Molungtad og usa ka semana ang nagkadaiyang display booth sa mga buwak sa Plaza Sugbo nga nagagikan pa sa nahisgutang mga barangay.
Tumong sa maong kalihokan mao ang pagpahinumdom sa publiko nga nagpabiling lig-on gihapon ang flower industry dinhi sa dakbayan sa Sugbo luyo sa nag-usab-usab nga dagan sa klima.
Giingong adunay mga mag-uuma ang nakuyawan nga mangamatay ang ilang mga tanom nga buwak gumikan sa pag-usab usab sa dagan sa panahon apan gidasig sila sa siyudad sa pagpadayon sa ilang panginabuhi gumikan kay adunay mga pamaagi sa pagprotehir sa mga buwak.
Ang buhatan sa City Agriculture Department (CAD) nga gipangulohan ni Joey Baclayon nagpadayon sa pagpatuman sa nagkadaiya nilang mga pagbansay-bansay alang sa mga nagkadaiyang mag-uuma sa kabukiran.
Nasayran nga himalitan usab kaayo ang mga produktong buwak sa Sugbo, gani adunay mga tawo nga gikan sa kaulohan nga anhi mismo mo-order og buwak sa dakbayan, matud pa ni Baclayon. - BANAT NEWS