Impeachment court giporma sa senado

CEBU, Philippines -  Gisugdan na sa Senado kagahapon sa hapon ang pormal nga pagporma og impeachment court nga moatiman  sa kaso batok ni Chief Justice Renato Corona.

Base sa report sa GMA News gihulagway niini nga nagsul-ob sa ilang mga scarlet nga toga ang mga senador gipangunahan ngadto sa session hall pinaagi sa sergeant-at-arms sa senado.

Gipangunahan pinaagi ni Senador Antonio Trillanes IV, ang mga senador nanumpa   samtang magsilbi isip   mga huwes sa nahisgutang impeachment court.

Base sa naandang tradisyon, ang labing batan-on sa mga senador maoy nanguna sa maong pagpapanumpa.

Human sa oath-taking, ang mga senador mipadayon sa ilang agenda alang sa maong adlaw.

Sa miaging Lunes, ang House of Representatives mipa-impeach ni Corona gumikan sa giingong graft and corruption, culpable violation of the Constitution, ug ang pagluib sa pagsalig sa publiko.

Niadtong Martes ang House of Representative mipadangat na sa Articles of impeachment   ngadto sa Senado.

Hinuon ang pormal nga imbestigasyon may kalagmitang unya na mahitabo sa Enero sa sunod tuig nga ipahigayon gikan sa Lunes hangtod sa Huwebes matag alas 2:00 sa hapon sa senado.

Kini maoy ikaduhang impeachment nga gilusad sa ubos balay balauranan ning tuiga 2011.

Ang unang gipa-impeach sa   House of Representatives mao si Ombudsman Merceditas Gutierrez   gumikan gihapon sa giingong pagluib niini sa pagsalig sa publiko gumikan sa kadyutay ra niya og nakonbiktong mga opisyal sa gobyerno ug sa kapakyas niya sa pagpakanaog og lakang sa lima ka mga bug-at kaayong kaso sa panahon sa administrasyon ni Arroyo.

Ang maong kaso gipasaka ngadto sa Senado nga nagsilbing impeachment court apan mideklarar si Gutierrez sa iyang pagdemiter sa   katungdanan uban sa iyang pamahayag nga ang iyang loyalidad anaa pabor   sa mga Filipino ug dili kay kang Mrs. Arroyo kinsa maoy nagbutang kaniya sa iyang puwesto.

Bahin sa proseso sa impeachment, ang Section 3, Article X1 sa l987 Constitution nagbatbat   nga ang House of Representatives   mao lamang ang bugtong may gahum sa paghimo og lakang bahin sa impeachment   samtang ang Senado usab mao lamang ang may gahum sa pagpahigayon sa imbestigasyon sa kaso ug sa pagpakanaog sa ilang desisyon sa tanang kaso sa impeachment. Base sa maong balaod kini nagbuot nga ang usa ka natino na nga kaso sa impeachment mahimong isang-at bisan ni kinsang sakop sa ubos balay balaoranan o kaha ni kinsa mang lungsoranon nga iindurso sa mga magbabalaod sa ubos balay balaoranan.

Ang kaso ipasa dayon ngadto sa hingtungdang House Committee kinsa maoy motakda sa pagpaminaw sa maong isyu ug pinaagi sa boto sa mayoridad motunol   og report   ug usa ka resolution ngadto sa mga magbabalaod sa House nga tun-an usab sa hingtungdan sulod sa 60 diyas.

Ang Constitution nagbuot nga pinaagi sa boto nga dili mominus ika-tulong bahin sa mga miyembro sa   House of Representatives maoy gikinahanglan aron sa pag-apirmar o kaha sa pagsanta sa usa ka resolusyon uban sa Articles of Impeachment sa komitiba.

Kun ikahatag na ang apirmatibong boto ang Senado mopadayon na sa impeachment. (BANAT NEWS)