Tiil kalabira na

CEBU, Philippines -  Padong nang madugta ug gani kalabera na ang dapit sa tiil sa usa ka 70-anyos nga ulitawong guwang nga napalgan sulod sa compound sa iyang balay sa barangay Cansojong, dakbayan sa Talisay kagahapon sa buntag.

Ang patay nga napalgan mao si Feliciano Daan, residente sa maong dapit kinsa nag-inusara nga nagpuyo sa iyang balay ug gituohan nga giatake kini sa iyang gihambin nga sakit.

Si SPO1 Mikie Espina ug PO2 Stephen Sefuesca kinsa maoy miresponde sa report kabahin sa maong insidente nagkanayon nga wala sila’y pagduda nga adunay foul play sa kamatayon ni Daan apan dako sila og pagtuo nga giatake kini sa iyang sakit.

Apan matud ni Espina nga sa ilang pakisusi, ang mga paryente ni Daan wala mobutyag kanila kung unsay sakit nga gihambin sa namatay.

Ang mga polis adunay napalgang mga tambal sa sulod sa balay niini nga gituohang maintenance sa namatay.

Si Daan giingong gisuportahan sa iyang pag-umangkon nga nagpuyo sa dakbayan sa Lapu-Lapu ug pagaduawon lang kini sa iyang balay sa Cansojong.

Sa milabay’ng tulo ka adlaw ang mga silingan ni Daan nakapanimaho og patay nga maoy hinungdan sa pagsusi nila sa ilang palibot hangtod nga nakahukom sila sa pagsil-ing sa balay ni Daan.

Matud usab ni Espina nga nagtuo ang mga silingan ni Daan nga mananap lang ang namatay apan kagahapon migrabe na ang baho hinungdan nga nanawag na og mga polis ang mga silingan niini aron masusi ang sulod sa balay.

Usa sa mga pag-umangkon ni Daan nga taga Cansojong usab mibutyag nga wala silay kasayoran sa kamatayon sa ilang uyoan.

Gibutyag sa maong mga polis nga nagpadong na og kadugta ang patay’ng lawas ni Daan ug gani ang dapit sa mga tiil niini kalabera na.

Gituohan nga pipila na ka adlaw sukad mamatay si Daan apan wala kini maugkat tungod kay walay nasayud sa nahitabo kaniya. (BANAT NEWS)