Pabuto sa kilidkilid sakmiton

CEBU, Philippines - Gipahimangnoan ni Cebu City Market Administrator Raquel Arce ang mga vendors sa firecrackers nga dili gyud magpataka og display sa ilang paninda gumikan kay kumpiskahon gyud kini sa task Force Pabuto nga pormal na nga gilusad sa siyudad sa Sugbo niadtong Biyernes.

Nagkanayon si Arce nga gitahasan ang maong grupo pagsikop sa mga gipanindang pabuto gawas sa firecracker zone nga gitagana diha sa South Road Properties.

Apan nasayran nga bisan paman sa pahimangno sa siyudad tungod sa kapeligro niini sa mga tawo aduna gihapoy mga badlungong mga vendors nga padayong namaligya niini sa tinago-tago nga paagi.

Ang masakpang namaligya niini gawas sa SRP makamulta og P2,000 ug pagpasaka og kaso sa korte.

Sa pagkakaron 80 na ka vendors sa firecrackers ang nagparehistro kanila ug dili na na sila manawat og bag-ong aplikante sanglit giandam na nila ang sakto nga area alang niini ga pormal nga buksan karong Disyembre 15.

Matag stall adunay distansiya nga 6 ngadto sa 7 ka metros aron segurado nga layo kini sa peligro. Gipahimangnoan usab ni Arce ang vendors ug mamalitay og pabuto sa SRP nga dili gyud manigarilyo sa area. Naka-standby usab sa maong lugar ang trak bombero aron dunay dali nga maka-responde panahon sa emerhensya. (BANAT NEWS)